18/06/02 Kohinga Kōrero: Mihi/Intro
Kua rihaina tetahi o nga puukenga Māori o te ao Torangapu a Sandra Lee, heoi,
kaare ia e tuu ano ana ki nga kowhiringa Pooti a tera marama e heke iho nei.
Ko Sandra Lee te Tumuaki tawhito o Mana Motuhake, koia ano hoki te Tumuaki
tuarua tawhito o te roopu Tuhono
No te tau 93 ka urutomokia e Sandra Piawai Te Hakamatua Lee o Poutini Kaitahu
ki roto o te whare paremata - koia te wahine Māori tuatahi ki te toa i roto i
tetahi rohe whanui, ara ko Te Puku o Tamaki Makaurau.
No te paunga o tera wiki, ka puta te kōrero a Sandra - kei te whakaaro tonu
ia mo nga ra kei mua i a ia.
Heoi, e meatia ana, ka ritaia ia i tenei pootitanga.
I kōrero atu ta matou kaikawe kōrero a Erana Karauti ki a Kato Kauwhata o
Ngapuhi, kaumatua o te Marae o Te Piritahi kei te motutere o Waiheke, kia
whakarongo ake tatou.
Audio
Me ona ake whakaaro kia huri ake tatou ki a Te Pare Josephs kaumatua o te
roopu MM.
Audio
Ko te reo tera o Te Pare Josephs..
Kua hurahia he kohatu whakamaumaharatanga i Oaakura ki Taranaki, mo nga toa e
rua tekau ma wha i mate i te pakanga ki nga hooia a te Karauna Pakeha i te
139 tau ki muri, mo nga whenua tupuna te take. I tapaina toua pakanga, ki te
ingoa o te Katikara, te awa e tere iho ana ki raro o toua pito onekura.
He tuatahi tenei ma te Kawanatanga hei tautoko i te kaupapa penei rawa mo nga
Māori kua patua e te ringa Pakeha te take.
Na nga Minita a Judith Tizard raua ko Taariana Turia toua kohatu i hurahia,
hei taa te Minita a Judith Tizard, koinei tonu te tikanga tika mo nga
tupapaku kua mate i te take ehara no ratou anake i toa engari he tangata, he
teina , tuakana, matua, he taane, he tamaiti.
Na reira kia tahuri ake tatou ki te kōrero tahi ki a Te Rukoriri Wharehoka,
he kaumatua no Parihaka. Koianei tetahi i tino whakahee kino ana ki te
Karauna mo te kore e mahi tahi ki te iwi Māori.
Anei tetahi o nga Raukura Tatarahiki o Taranaki i kaha whakaheetia ki oua
mahi hura kohatu no nga rangi whakataa nei a Te Rukoriri Wharehoka .
Audio
Kati ra kua rongo tatou ki a Te Rukoriri Wharehoka..
Oti ra e te iwi. . . . . .
----