Ngā Wai e Rua

Kei tēnei pakipūmeka (45 miniti tōna roanga) ngā tino kōrero o te motu i ngā taonga ataata-rongo.

Please note: The footage and commentary within the film reflects the time in which it was taken.

I te tau 2019, i whakanui a Aotearoa i te huringa 250 o ngā tau mai i te wā tuatahi i tūtaki ai te Māori me te Pākehā i uta, me ngā whakatutukitanga a ngā kaiurungi me ngā kaihōpara i tae mai me te whakakāinga mai i a Aotearoa e hia kē ngā tau ki mua.

Ko te kohinga ataata Ngā Wai e Rua: Stories of Us, he hua o te rangapū i waenganui i Te Tāhuhu o te Mātauranga me Ngā Taonga Sound & Vision, i ahu mai i tā mātou kite i te pai o te kaupapa Tuia 250 he āheinga ia kia kitea ētahi o ngā kōrero tūhāhā o tō tātou whenua mā ngā taonga ataata, pūrongo anō mai i te tau 1900, kua roa te tiakina e Ngā Taonga. Mai i ngā hui ā-motu whakahirahira ki ngā kaupapa kaiparāoa, ko ēnei katoa he wāhanga o te kōrero, e kī ana, ko wai tātou, nō hea tātou.

Ko te tātari i ēnei taonga whitiāhua ki te hōtaka 45 meneti tētahi mahi āhuareka. I te hiahia mātou kia kaha te rongohanga i ngā kōrero me te hītōria paparua o Aotearoa mai i ngā mea i tīpakohia e mātou, ko te tūmanako mā Ngā Wai e Rua: Stories of Us ka ea ki a koe.

Ngā taipitopito hōtaka

Ko tā Ngā Taonga Sound and Vision he kohikohi, he tiaki, he tiritiri i ngā taonga rongorau o Aotearoa. Kua oti katoa ngā kiriata, rongorau kei roto i Ngā Wai e Rua: Stories for Us te arotake, te whakawātea hoki e te kaituku mai, e te kaipupuru manatārua, me te iwi, hei kaitiaki.

Kua whakarārangitia ā raupapa-wā ngā taonga nei, mai i ngā kapohanga kiriata tuatahi rawa o Aotearoa, ki ngā kiriata kua whakaputaina i ēnei tau tata.

Kia mārama, ka horaina he tuhinga mō ia kapohanga e whakamahia nei i roto i te huinga kōrero tōpū i te whārangi whai i muri, kia mārama ai koe ki ngā kiriata, ki ngā ororongo i roto i te horopaki tātai kōrero o mua. Ko ngā kaiako e hiahia ana ki te ako me pēhea te whakamahi i te kohinga kiriata, ororongo, hei whakaoho i ngā kōrero kia ara mai hei taonga mō ēnei whakatupuranga, ka taea te īmēra mai ki a mātou information@ngataonga.org.nz.

Kia mārama, ko ētahi o ngā kiriata i roto i Ngā Wai e Rua: Stories for Us kāore anō kia tino whakaorangia. E hari ana a Ngā Taonga mō ngā takoha katoa mai o ngā kiriata, ororongo, e taea ai ā mātou taonga tuku iho te whakaora.

Hei kōrerorero

He tata ki te 50 ngā kiriata i roto i Ngā Wai e Rua: Stories of Us, ā, he kaponga kanohi ēnei mō ngā tātai kōrero o tō tātou whenua i roto i te kiriata. Tō mātou tūmanako ia mā ēnei kapohanga e whakaoho tō kaingākau ki te ako i ētahi atu tātai kōrero, e ara ake ai ētahi pātai torotika mō te nohonoho mai o te Māori me te Pākehā ki Aotearoa.

Ehara Ngā Wai e Rua: Stories of Us i te pakipūmeka, ehara hoki i te kohinga torowhānui o ngā āhuatanga hāngai o ō tātou tātai kōrero o mua - i whakaurua mai ngā taonga kapo kiriata ki Aotearoa i 1885 noa iho, ā, ehara i te mea i hopukina ngā rā me ngā āhuatanga katoa e whakaarotia ana he rā nui i ēnei rā, i ērā wā. Ko tō mātou whakaaro ia, mā konei ka piki ake ō whakaaro mō te āhua o te hopu i ō mātou hītori, ā, kua whakaurua atu hoki ētahi take kōrero i raro iho nei - ahakoa ēnei, te tūmanako he take anō āu.

  • Ko wai i te pupuri i te kāmera?
  • Ka pā ngā whakaaro o te kaihanga kiriata ki ngā paki ka whakaaturia e ia?
  • He aha ngā tino whakaaro taketake o te kiriata?
  • He pēhea/he aha i pēnei ai te whakaatu i ngā tāngata o Aotearoa i ēnei kiriata?
  • He pēhea tō titiro ki ēnei kiriata i ēnei rā?
  • He aha ngā kōrero me ngā tāngata kāore i tino hopukina ki te kiriata?

Mō Tuia Mātauranga

Tā te kaupapa mātauranga o Tuia Mātauranga he tautoko i te whakaakoranga, me te akoranga, mā te whakatairanga i ngā tāngata, i ngā wāhi me ngā āhuatanga nunui o tēnā rohe, o tēnā rohe, i noho hei wāhanga taketake o ngā tātai kōrero o Aotearoa. Tā Tuia Mātauranga he whakahihiri i te tamariki me te rangatahi kia tūhura i ō rātou kōrero tuku iho, kia marama ai rātou ki tō rātou whakapapa, tuakiri hoki.

Kimihia ētahi atu mōhiotanga i www.tuiaeducation.org.nz.

Ministry of Education logo