He Taonga Pūmau Hei Tuku Iho ki ngā Uri Whakatupu
11 Nov 2021
He manomano ngā hāora ataata-rongo Māori ka tiakina i raro i te hononga o Whakaata Māori me Ngā Taonga.
I te whakaaetanga, i hainatia i te rangi nei (11 Whiringa-ā-rangi), ka mahi ngātahi ngā umanga e rua kia taea ai e ngāi Māori me ngā iwi te pā atu ki ā rātou taonga ataata-rongo, he taonga tuku iho.
Hei tā te Tāhuhu Rangapū o Whakaata Māori, tā Shane Taurima, mā te hononga ki Ngā Taonga e taea ai e ngā umanga e rua te tautoko i ngā mahi whakarauora i te reo Māori me ngā tikanga Māori.
Ko tā Taurima anō, i te tūranga o Whakaata Māori hei whare pāpāho taketake o Aotearoa, kei te ū a ia ki te mahi ngātahi me te tautoko i ngā hoa kōtui o te rāngai. 'Nā tātou katoa ēnei kōrero – mā te mahi ngātahi, ka tiakina, ka whakanuia, hei taonga mā ngā apataki o nāianei, o āpōpō anō hoki'.
E ai ki te Tumu Whakarae o Ngā Taonga, ki a Honiana Love, 'Koinei te tīmatanga o tētehi huarahi hou e mahi tahi ai mātou ki te tiaki, ki te whakatuwhera hoki i ngā ara ki ngā mātauranga Māori. Kei te hiamo mātou ki te āta mahi tahi me Whakaata Māori kia tiakina ā rātou kaupapa mīharo, kia puritia hei taonga matihiko mā ngā uri whakaheke.'