Lu Uruamo Paul (1911-1943) - Ngāti Whātua (Image: Airini Ngā Roimata Grennell - Ngā Taonga Sound & Vision collection)
Lu Uruamo Paul - Au e Ihu
I tātakina Te Rōpu Rua Tekau mā Waru i te hīmene Au e Ihu i te hōpuni i Te Tai Tokerau e Lu Uruamo Paul, te tau 1943.
I tupu ake a Lu (Lou) Uruamo Paul i ngā takiwā o Ōrākei me Rewiti i Tāmaki Makaurau. Nō ngā tau 1920 ka rongonui ia i tana pēne Lu Paul me ana Māori Maids. Nō te tau 1939 ka puta tana waiatatanga i te waiata a Walter Smith: Beneath a Māori Moon i Beacon Records i Rimutahi i Tāmaki Makaurau. Kātahi ka puta tētahi rekoata Māori, ahakoa i pēhihia i Amerika.
He mōhio hoki a Lu ki te purei, mahi hākinakina, pēnei i te whutupōro me te tēnehi, i purei hoki ia mō tana rohe.
Ko ia tētahi o ngā kaipāho Māori i runga i 1ZB i te Ratonga Pāpāho o Aotearoa i te tau 1936. Ka pāho ia i a Pōtapu, ahakoa kāre ōna rangatira mahi i whakaae kia puta te reo Māori, ka tono ia tōna whānau kia haria ki te teihana kia waiatahia ngā waiata Māori, kia rangona te reo i ngā aratuku.
I te wā i pīrangi ia ki te haere ki te pakanga, ka tonoa ia e te Ratonga Pāpāho kia tū hei kaipūrongo pakanga, engari ka kuhu kē ia ki te Kamupene A o te Rua Tekau mā Waru ki raro i a Kāpene Hēmi Hēnare.
Nō te Hakihea o te tau 1943, ka aratakina tētahi rōpū mauhere e rāua ko tētahi atu Rūtene, engari ka pūhia rātou. Mea rawa ake ka takahia tētahi papa maina, ka mate rātou ko ētahi atu tokorua, tangihia tonuhia ia e ngā kaiwhakarongo reo irirangi i te kāinga. Ka tanumia ia ki te urupā o te Awa o Sangro ki Cheti, Itari.
(Nā te whānau ēnei kōrero)
Tohutoro Kohinga 55749
Te tau 1940
Te Aritaua Pitama (1906-1958) - Ngāi Tahu, Ngāti Mamoe
Te Aritaua Pitama, Aotearoa Calling
Ka tonoa a Pitama e Colin Scrimgeour o te Ratonga Pāpāho hei kaipāho Māori ki runga i ngā teihana ZB. Pāho ai ia i 3ZB i Ōtautahi mō ngā tau e hia, ka ako hoki i ngā waiata Māori, ngā haka, poi, waiata Ratina hoki. Kāore i oti ana mahi kohi pūtea mō te pakanga.
I tēnei wāhanga ka kōrero mai te hōtaka Aotearoa Calling, he tauira pai ki te hiki te reo Māori i ngā hōtaka ahakoa e meatia mai ana e ngā rangatira mahi kia ū ki te reo Pākehā.
Tohutoro Kohinga 263397
Te tau 1940s
Kīngi Te Aho Aho Gilling Tahiwi Jnr (1914-1942) - Ngāti Raukawa (Image: Cover of New Zealand Listener, 25 September 1942 - Alexander Turnbull Library)
Ka Kōrero a Kīngi Tahiwi mai Rānana
Ko Kīngi te tangata tiaki i te hōtaka mō ngā wāhine i runga 2ZB, he pai ngā kaiwhakarongo ki te rere o tana reo me tana purotu hoki. Ka timata mai ana te pakanga, kātahi ia ka kuhu ki te Ope Taua Rererangi o Piritana, e hia kē ana pāhotanga ki te kāinga mā te BBC e pā ana ki ngā āhuatanga o te pakanga ki a Ngāi Tāua e noho ana ki Rānana. Kāore i roa i muri mai i tana pāhotanga Calling New Zealand i te Mahuru o te tau 1942, ka ngaro tana waka rererangi ki te rohe o te Mediterranean, ā, pōuri anō ai ngā kaiwhakarongo o Aotearoa i te rongotanga ake.
I tēnei rekoata ka oti i a Tahiwi te hōtaka Calling NZ i pāpāho mai Rānana i te tau 1942.
Tohutoro Kohinga 31663
Te tau1942
Edward (Ted) Henry Nēpia (1904-1983) - Ngāti Kahungunu (Image: Te Papa Tongarewa Museum of New Zealand (PA.000044) - Richard John James Thomson, c. 24 June 1944)
He karere nā Ted Nēpia ki te Kāinga
I Ōkautete, i Whakaoriori a Edward Henry Nēpia i mua i tana haerenga hei tāriana ki roto i Te Rua Tekau mā Waru i te pakanga tuarua. I a ia i Itari i te tau 1945, ka mau i te Ratonga Pāpāho tana reo e kōrero ana mō Te Rua Tekau mā Waru. Ko tana kuhutanga tēnei ki ngā mahi pāho.
Ka mau te reo kōrero e rua a Nēpia i mua o tāna timatanga mahi mō 2ZC i te wā he hōia ia mō Te Rua Tekau mā Waru mai Itari, he pānui ki ōna whanaunga, hoa hoki.
Tohutoro Kohinga 19985
Te tau 1945
Airini Ngā Roimata Grennell (1910 -1988) - Ngāti Mutunga, Ngāti Tama, Kāi Tahu (Image: Ngā Taonga Sound & Vision Collection)
Ko Airini Grennell rātou ko te rōpū Polynesian Trio
Nā ana whakaaritanga ā-pāho ka kuhu a Grennell ki te ao pāpāho, ka kuhu ki 4ZB ki Ōtepoti i te Hakihea o te tau 1938. I te rawe o tana reo me te tika rawa o te whakahua Māori, Pākehā hoki, pēnei tonu i ngā tāngata whai rawa o Ingarangi, ka tau tana noho ki tana tūranga. He reo tōiri ā, haere ai rātou ko ētahi atu kaipāho ki te motu ki te kohi pūtea mō te Pakanga Tuarua.
Ka tonoa ia, ā ka haere ia ki te mahi ki 1ZB i Tāmaki Makaurau, kātahi ia ka hoki ki Ōtautahi hei reo mō ngā teihana o 3ZB me 3YA, ka whakahaerehia he hōtaka wāhine hei pāho ki ngā hau e whā o te motu.
Ka rītaia a Airini Ngā Roimata Grennell i te tau 1966, i pau i a ia ngā tau e 28 e kōrero ana i ngā haere maitanga e rima o ngā rōera o Ingarangi, koia hoki tētahi o ngā wāhine Māori tuatahi kia puta te kanohi ki runga pouaka whakaata. He wahine koi, tātaki, ngākau māhaki hoki, nāna i akiaki te whakaaratanga o te ao ahurea Māori.
I tēnei rekoata i karawhiua he hōtaka waiata Māori e Airini Grennell me te rōpū ā Martin Winiata, ko Polynesian Trio.
Tohutoro Kohinga 182531
Te tau 1949