William (Wiremu) Leonard Parker (1914-1986) - Ngāti Porou (Image: Ngā Taonga Sound & Vision Collection)
He Poroporoaki ki a Tā Apirana Ngata, nā Wiremu Parker
I whānau ia i Waipiro i Te Tai Rāwhiti. Ka kuraina ia ki Hiruhārama me te Kāreti o Te Aute (1930-1936). He piriwheke ia, ka ārahina hoki te tima whutupōro hei kāpene, ka mahi i te pāmu o te kura i ana hararei kia māmā ai ana utu kura.
Ka tae ia ki ngā hui ki te whakarongo i ngā mātauranga e pā ana ki tana iwi, nō reira ka tino whakapono ia ki ngā kōrero tapu a te Māori. I honohia e ia ngā Ao Māori, Pākehā hoki, me te ao kōhatu ki te ao hou, i kapohia rā ngā mātauranga o Apirana Ngata mā.
Nō te tau 1937 ka tīmata tana Tohu Paetahi ki Te Whare Wānanga o Te Upoko o Te Ika-a-Māui i te taha o te tama a Apirana Ngata, a Hēnare, ka wehe i reira hei kaimahi mō te Tari o te Mātauranga i te tau 1938. He tino kaikōrero ia, he mōhio ki te tuhituhi Māori. Ka tohua ko ia te kaipāho Māori tuatahi i runga i ngā kupu akiaki a ngā mema Pāremata Māori ki te Rūnanga Matua o te Kāwanatanga.
He kaipāho koi ia, ā ka mōhiotia tana ingoa ki roto i Te Ao Māori i runga i tana pāho ā-wiki e pā ana ki te pakanga, ngā pānui mate o ngā mea o Te Rua Tekau mā Waru me ētahi atu kōrero o te ao Māori. E aroha ana nō te mea kāore i mau ēnei kōrero nō te mea kāore i whakaaetia i te wā o te pakanga.
He tino kōrero tāna e pā ana ki ngā tohutohu a Te Pīhopa o Aotearoa ki a ia, ara, a Pererika Bennett, māna tētehi poroporoaki hei taki i tana hōtaka, kua mate hoki tētahi kaumātua. Heoi anō, kāore ngā ture o tana tari i whakaae kia uru ngā kaupapa ohorere ki ngā hōtaka, nō reira ka whakahuatia tana poroporoaki ki te reo Māori, ka waimarie ia nō te mea i tautokotia e te Kaitohu Pāpāho Matua. Muri iho, ka āhei anō tāna i pīrangi ai i ana pāhotanga.
Nā Parker ngā pāhotanga mō te hokinga mai o Rua Tekau mā Waru i te Kohitātea o te tau 1946, ka poroporoakitia hoki a Tā Apirana Ngata i te tau 1950. Nāna i whakahaere te hōtaka a The Māori Programme mai i te tau 1964, ka kauwhau hoki ia e pā ana ki te reo me ngā tikanga Māori i Te Whare Wānanga o Te Upoko o Te Ika-a-Māui. Nō te tau 1981 ka mahi ia i a David Somerset hei ētita hei kaituku kōrero hoki ki ngā hōtaka, ka puta tana pukapuka a Whaikōrero; ceremonial farewells to the dead, me ētahi rīpene e toru hei tautoko.
Nō tana matenga i te tau 1986 ka whakawhiwhia a Parker ki te Tohu D. Lit mai Te Whare Wānanga o Te Upoko o Te Ika-a-Māui, ka whakanuia anō ia ki Te Tohu Whakamaumaharatanga ki a Wiremu Parker hei mahara i ngā mahi i oti i a ia. I tanumia ia i te urupā o Te Puni ki Pitoone.
I tēnei wāhanga kōrero ka poroporoakitia a Tā Apirana Ngata e Wiremu Parker.
This is an excerpt from the recording 'Eulogy to Sir Apirana Ngata'.
Listen to more broadcasts of Wiremu Parker (English).
Tohutoro Kohinga 25961
Te tau 1950
Kēpa Hamuera Anaha Ehau (1885-1970) - Ngāti Tarawhai, Ngāti Whakaue (Image: Governor General, Lord Jellicoe, addressing Arawa Maori at Whakarewarewa with Kēpa Ehau, 1921 - Alexander Turnbull Library, PAColl-8900)
Kepa Ehau - He Manukōrero Aratuku
E hia tau e mahi ana ngā reo irirangi, kāore i whānui te aro mai ki tō tātou reo, heoi anō, i tae ngā reo Māori ki te pāho kaupapa i ētahi taima nui o te motu. Ko ētahi, ko Kēpa Hamuera Anaha Ehau (1885-1970, Ngāti Tarawhai, Ngāti Whakaue), i mōhiotia ana whaikōrero mō Te Arawa, mō tana whakatupuranga hoki.
He kaiwhakamāori ia, i mau haere tana reo i te teihana o 1YZ/1YC i Rotorua i ngā tau 1950-1960. He pāhotanga poto āna mō ngā pakiwaitara o te takiwā, i poroporoakitia a Kīngi Hōri te Tuarima rāua ko te Pirimia a Peter Fraser, ka mihia hoki e ia te Kūini Pākehā hou, a Irihāpeti i tana koroneihanatanga i te tau 1953. I puta ēnei kōrerotanga whakahirahira, reo Māori, reo Pākehā hoki, ki ngā pāhotanga ā-motu. Ko tana mihi tēnei i te matenga o te Pirimia a Peter Fraser i te tau 1950.
Tohutoro Kohinga 33029
Te tau 1950
Te Aritaua Pitama (1906-1958) - Ngāi Tahu, Ngāti Mamoe (Image: Ngā Taonga Sound & Vision Collection)
Te Aritaua Pitama, Whakatauki and Waiata
I whānau mai a Te Aritaua Pitama i Tuahiwi i te rohe ki Kaiapohia, hei mātāmua ki ngā tamariki 12. Ko ana tino hapū ko Ngāi Ruahikihiki rātou ko Ngāi Tūāhuriri ko Ngāi Te Rakiamoa ko Ngāti Hinematua o roto o Ngāi Tahu rāua ko and Ngāti Mamoe.
He matatau ia ki ngā reo e rua (kāore i pērā te tangata i Te Waipounamu i aua wā), i akohia e ia ngā whakapapa o Ngāi Tahu e tana whaea e Manakore rāua ko te kaiako kōrero tawhito o Ngāi Tahu, a Teone Taare Tikao. I kuraina a Pitama i ngā kura o Tuahiwi me te Kāreti o te Karaiti tae noa ki te tau 1924, i tana huringa hei kaiako i te Kura o Rātana Pā i te taha o tana whaea, ā ka neke ki te Nupepa o Te Papaioea mahi ai.
Ka hoki ia ki Tuahiwi i te tau 1934 ka mahi kāmura poroteke, engari ahakoa tana rangatahitanga (e 28 ngā tau), i whakaarotia ia hei kaumātua, hei kaikōrero hoki hei whakatau i a Tahupōtiki Wiremu Rātana i tana taenga ki te tangihanga o tana tama a Ārepa, i moe ki te wahine Ngāi Tahu.
Nāna te tono ki te Tiuka o Gloucester kia haere mai ki Tuahiwi, ka riro māna hei whakahere te whakatau a te tiuka ki Ōtautahi i ngā tau 1934-1935. Nō te piringa o Rātana rāua ko te Rōpū Reipa, ka whakahaerehia e ia te pōtitanga i a Eruera Tirikātene mō te tūru o Te Tai Tonga.
I kōnei a Pitama te whakamārama i ngā wāhi ingoa Māori, he whakatauki, waiata hoki ki te hiki te reo Māori i ōna āhua o te wā.
Tohutoro Kohinga 55767
Te tau 1952
Kīngi Matutaera Ihaka (1921-1993) - Te Aupouri (Image: Governor General, Sir Paul Reeves, at the investiture of Archdeacon Sir Kingi Ihaka - Alexander Turnbull Library, EP/1989/1785/10-F)
Rev. Kīngi Ihaka - He Manukōrero Aratuku
Ko tētahi atu kaipāho reo Māori ko te Minita o te Hāhi Mihinare, a Kīngi Matutaera Īhaka (1921-1993, Te Aupouri). He kaiwhakamāori anō ia pērā i a Kēpa Ehau, e mahi ana ia i ngā pāriha o te Upoko o te Ika. Ka toro hoki atu ia ki ngā whare pāpāho o Pōneke, ka mau ana hōtaka pēnei i tēnei tauira i whakahōtakatia i te tau 1954: he whakataukī Māori te kaupapa.
I muri atu ka puta tana reo ki te hōtaka reo Pākehā o Wiremu Parker e kī ana ko “Māori Programme,” nō te tau 1966 ka tohua ia ki te komiti tohutohu o te Kaporeihana Pāpāho. I tana tūnga hei Ātikona, ka rongo haere tana reo i a ia e kauwhau ana ki ngā hui me ngā karakiatanga, ā, aru tonu atu ngā kaipāho i a ia ki te rapu i ana whakaaro mō ngā take o te wā.
Tohutoro Kohinga 177780
Te tau 1954
Airini Ngā Roimata Grennell (1910-1988) - Ngāti Tama, Ngāti Mutunga, Ngāi Tahu (Image: Ngā Taonga Sound & Vision Collection)
Airini Grennell i Pōwhiri te Minenga
I whānau mai a Airini Ngā Roimata Grennell i Wharekauri i te tau 1910, ka 10 ana tau ka neke tana whānau ki Akaroa. Ka kuraina ia i te Kura Kōhine o Ngākau Tapu i Ōtautahi, he toa ki te purei haupōro, poitarawhiti hoki mō tana rohe. Ka tamāhine ana, ka tae ki Ingarangi i runga i tana mōhio ki te waiata, ka whāia e ia ngā tohu ako LTCL me LRMS i te waiata me te ako purei piana.
Nō tana hoki mainga ki Aotearoa ka whakatūngia e rātou ko tana whānau te tira waiata o Koukourarata hei kohi pūtea mō te wā o te pōhara nui i ngā tau 1930. Ka kuhu hoki ki Te Tira Waiata Māori i a Te Uira Mānihera rāua ko Inia Te Wiata. Nā te minita, nā Rev A.J. Seamer i tū ai te tira. Ka tae te tira ki Ahitereiria, ki Ingarangi me Īnia, ka mutu ngā mahi i te tau 1938. I te reka o tana reo ka kīia ko ia ‘Te Reo Rōreka o Wharekauri.’
I tēnei rekoata i pōwhiritia e Airini Grennell te minenga i te reo Māori.
Tohutoro Kohinga 145841
Te tau 1958